Z Města/Cottbus. Wjele lět pśiwabijo Elbenwald-festiwal luźi z cełeje Nimskeje, Awstriskeje a Šwicaŕskeje do Chóśebuza. Na drugem kóńcu tyźenja awgusta jo se Park Sprjewinego ługa (Spreeauenpark) zasej pśeměnił do bajkoweje góle – do městna połnego muziki a źěłaŕnickow, źož fany mógu z kostimami a graśami do role swójich comic-ryśarjow a drugich nejlubšych charakterow zalězć. Na tych tśich dnjach festiwala jo dało wótměnjaty program – na wjelikem jawišću, na mjeńšyma jawišćoma a hynźi.

K lětosnemu jawišćowemu programoju jo teke słušało live-nagrawanje podcasta. Ale nic někake nagrawanje, ale jo se jadnało wó podcast k serbskim powěsćam. A to w nimskej ako teke w serbskej rěcy. „Dla togo, až našo nagrawanje jo se zachopiło krotko pśed pśezpołdnjejšym casom, stej wobej teama se pśiwobrośiłej powěsći pśezpołdnice“, groni Marian Joel Küster, jaden tych akterow pod- castowego rěda „True Łužyca“.