Ze Syjka/Graustein. Slědny pětk w juliju su w grodkojskem měsćańskem źělu Syjk rozny kamjeń za nowy zgromadny wejsański dom sajźili. Pśi tom twaŕskem projekśe źo wó saněrowanje wobstojecych twarjenjow kaž teke wó nowotwaŕ źiśownje, hale jězdźidłow za dobrowólnu wognjowu woboru a źělne saněrowanje zgromadnego wejsańskego doma. Wenkowny wobłuk se nowo planujo a se nowo wugótujo.

Jens Schuster wót wuwjedujucego planowańskego a architekturnego běrowa AIB GmbH z Budyšyna jo se wuźěkował městoju Grodk a wejsnej pśiraźe Syjka za doněntejšne spušćobne gromadne źěło. „We casach, gaž druge gmejny muse źiśownje zacyniś, jo to zapśimujuce wupominanje, how we tom grodkojskem měsćańskem źělu jadnu źiśownju pó nejmodernjejšych měrach nowo natwariś.“