Ze Serbskego domu/Wendisches Haus. Te drogi k mólowanju bildow su cesto wjelgin wšakorake a hynakše. To pokažo nejnowša wustajeńca w Serbskem domje w Chóśebuzu, ako jo Lodka insceněrowała. Ako moto su za to se wupytali „Łužyske grajkanje z barwami/Lausitzer Farbspiele“.

Marita Wobser z Města pokažo něnto až do 16. oktobra jadnab 20 wobrazow, ako jo wóna mólowała. Na nich jo zapópadnuła krajiny, pśirodu a teke wšake ze serbskego žywjenja – drastwu, nałogi a powěsći. Jeje wobraze su wjelgin pisane a chytaju śopłotu a měr. Na zachopjeńku jo mólowała źiśi, swójogo cłowjeka, psa, ale tek južo abstraktne wobraze.

„Gromaźe z mójim cłowjekom smej wušej 30 lět dłujko měłej w Nowem Chmjelowje źěłaŕnju za wupórěźenje crjejow a za nowe kluce. To jo wót naju napominało wjele źěła a casa. Togodla som něco pytała, což jo mě dało tšošku měra. Toś som se dała do mólowanja, z kótarymž ga běch se južo ako młode šulske źowćo zaběrała. Napśisko som měła ideju a wjacor pó źěle som pśecej cesćej mólowała“, jo wóna pśi wótwórjenju wustajeńce slědny tyźeń stwórtk tym wušej 60 woglědarjam wulicowała.