Z Města/Cottbus. Wobrazowka w chóśebuskem głownem dwórnišću, kótaraž jo słušała k wustajeńcy „Chóśebuz: Dwórnišćo dopomnjeśa. Deportacije a nuźone źěło w nacionalsocializmje“, jo se wót njeznatych znicyła. Za wšym zdaśim jo se display z twardym pśedmjatom rozbił. „Z tym jo se wažny wobstatk našeje wustajeńce k brjakoju cynił. Ta instalacija jo dopomnjeła na luźi, kótarež su se wót Chóśebuza sem deportěrowali a pód pśeslědowanim nacionalsocialistow śerpjeś musali. Taki napad trjefi togodla wěcej ako jano techniski rěd. Naźejamy se, až statk se malsnje rozjasnijo“, groni Heide Šinowscyna, jadnaŕka Centruma cłowjeskich pšawow (Menschenrechts- zentrum) w Chóśebuzu. W kooperaciji z drugimi lokalnymi akterami se stara wóny centrum wó projektowe źěło ku tej wustajeńcy. Wó njej jo Nowy Casnik w 26. wudaśu togo lěta informěrował. Dla znicenja wobrazowki jo policaja pśespytowanja startowała.