Z Budyšyna/Bautzen. Swěźeń poezije k cesći 170. narodninow Jakuba Barta-Ćišinskego pśedslědnu sobotu jo było zmakanje pśijaśelow, kótarež njejsu se južo dlej wiźeli, gaž njejsu se samo akle na tom wjacoru zeznali. Benedikt Dyrlich, kótaryž jo swěźeń z někotarymi drugimi pśigótował, jo nawězał ze zarědowanim na dłujkolětnu tradiciju swěźenjow poezije. Nad wšym jo stojała baseń Ćišinskego „Próstwa“, kótaruž su wšakorake basnikarje pśibytnym górno- a dolnoserbski, nimski, pólski, česki a ruski pśednjasli. W krejzu cytajucych su skerjej njeznate woblica napadnuli, mjazy nimi Frank Norten. Jogo lyrika, wudana we někotarych zběrkach a we wšakich rěcach, wótbłyšćujo jogo wobglědowanja cłowjeskich (nje)zamóžnosćow. Uwe Kolbe jo wuzwignuł wuznam Kita Lorenca za serbsku literaturu, Christoph Kuhn zasej jo pokazał na Elku Erb, kótaraž jo měła we Wuježku/Wuischke swój literarny refugium.