Projekt „SorbIT“ pśepšosyjo na kreatiwne wuběźowanje šyśa pód motom „Duch casa w cwjernje“

Kak dajo se tradicionelne drastwowe sukno do źinsajšnego casa pśenjasć? Toś to pšašanje stoj zasej w srjejźišću šyjarnego wuběźowanja „Duch casa w cwjernje“, kótarež wótmějo se w ramiku projekta „SorbIT – serbska inowacija pśez tradiciju“ w Slěpem. Format wobrośijo se na hobbyjowe šyjaŕki a šyjarjow, na za modu a design zagórjonych luźi ako teke na wšyknych, kótarež maju lušt, ze serbskich drastwowych suknow wuwijaś moderne, za wšedny źeń gódne unikaty.

Natakt projekta jo se wótměł 24. junija w Serbskem kulturnem centrumje Slěpe (SKC). Tam jo se pśedstajiło wuběźowanje, jo dało inspirěrujuce impulse, best-practice pśikłady ze šyjaŕnje 2025 a teke materialije su pśepódali. Mjaztym južo běžy něźi źewjeśtyźeńska indiwidualna faza šyśa, w kótarejž samostatnje zwopšawdniju wobźělujuce swóje pśedłogi.