Z Města/Cottbus. Chtož lubujo wjasoły ruš, ten jo měł w juliju za to dobru góźbu. Dogromady šesć razow ga su w „Małej komediji“ w rěźe „Chóśebuske lěśojske źiwadło“ luštny směšk (Schwank) pokazali, a to z mjenim „Drei Sorben auf Kumpeltod“. Wjele jo było napšawdu k smjaśeju, ale pópšawem njejo to było tak žortne. Jo ga šło wó to, až tśi młode muske su zgubili swójo lubowane źěło we wuglowej jamje a njewěźe, co dej se něnto staś. To ga jo něco, což w slědnych lětach su młoge nimske a serbske luźe bóžko dožywili a teke dalšnym to grozy, gaž wuglowe jamy a milinaŕnje we Łužycy wopśestanu producěrowaś elektrisku energiju. Teke Bartušojc familiju jo to trjefiło. Nan Fridolin a maś Trude wopytajotej swójogo syna Jörga změrowaś, kótaryž jo na swójo źěło ako górnik wjelgin gjardy. A gromaźe ze swójima starjejšyma a z dwěma pśijaśeloma daju se dla togo ten paleńc „Kumpeltod“ cesto słoźeś. To pak žedna wudroga njejo z teje situacije. Ale tak, ako se to cesto tšoj w źiwadle, jo se něco wósebnego stało. Su namakali list wót starego nana. W njom stoj, až jo pód domom něco drogotnego schowane.