Z Města/Cottbus. W serbskej community mjaztym derje znaty Pětš Śěžyński jo był gósć slědnego Serbskego blida, ku kótaremuž jo zajźonu srjodu wušej 30 luźi do Serbskego muzeja pśichwatało. Ku wjelikej licbje woglědarjow jo zawěsće to pśinosowało, až jo se wótměło toś to wudaśe Serbskego blida w ramiku kompaktnego kursa dolnoserbšćiny wót Šule za dolnoserbsku rěc a kulturu. Tak jo wjele kursistow góźbu wužywało, aby swóju dopołdnja w rěcnych kursach pśiswójonu wědu pón praktiski w běgu serbskego pśednoska a ze se pśizamkujuceju diskusiju wuproběrowali.