Wót 30. junija do 1. julija lěta 1951 jo se wótměł w Bórkowach wjeliki serbski kulturny swěźeń. Mjazy tymi něźi 30.000 wobźělnikami su byli teke młoge luźe z Górneje Łužyce. Jaden z nich jo był serbski spisowaśel Kśesćijan Krawc/Christian Schneider. Wón jo pśed krotkim napisał za „Serbske Nowiny“, co jo tegdy ako młody serbski wuknik dožywił w Bórkowach. Toś, cytajśo to ....

Casniki su tegdy pisali, až jo to było nejwětše serbske narodne zarědowanje w Dolnej Łužycy pó drugej swětowej wójnje. Na manifestaciji 1. julija na bórkojskem sportnišću jo był ako cesny gósć ministaŕski prezident młodeje DDR Otto Grotewohl pśibytny. Mimo nagronow a spiwow jo była masowa scena serbskeje młoźiny wósebny wjerašk. Něźi 400 pórow jo pśedstajiło w rejach burske źěła wót nalěśa do nazymy a tež serbske nałogi w běgu lěta. Choreografiju běšo Sonja Šajbic, źowka něgajšnego wjelelětnego starosty Serbskego sokoła Jakuba Šajby – Dobrošćańskego, zestajiła. Dokulaž som był sam rejowaŕ, pódam wó tom žedne drobnosći a tšojenja.