Z Pódstupima/Potsdam. Krotko pó wózjawjenju wusuda Wušego zastojnskego sudnistwa Barliń-Bramborska (glej NC29) jo Rada za nastupnosći Serbow w Bramborskej stojnišćo k tomu wózjawiła. We njom woblutujo Serbska rada wobzamknjenje sudnistwa, kótarež zawinujo, až serbski sedleński rum se zasej pómjeńšył. Z wuskim wótgłosowanim z krajom Bramborska pak se Serbska rada zbydnjo dalšne pšawniske srědki zapódaś. To pak wuraznje njegroni, až jo rada wobjadna z wšyknymi argumentacijami sudnistwow.

Něnt co Serbska rada se koncentrěrowaś na na pśichod wusměrjonu wěcnu politiku z tymi gmejnami, kótarež něnt pśisłušaju serbskemu sedleńskemu rumoju, aby tam serbsku rěc a kulturu spěchowała a serbskim wobydlarjam jich pó krajnej wustawje a Serbskej kazni pśistojece pšawy spśistupnili. To buźo teke tema na pśiducem pósejźenju serbskeje rady dnja 15. septembra.