Woglěd pśi nasypje a cerkwi we Wierum. Wobchójźenje pśez Ljouwert pśed starym popajźeństwom. Serbske wobźělujuce su byli wótlěwa Hartmut Leipner, Beno Bělk, Šarlota Kušcyc a Měto Nowak. Kupkowy wobraz pśi wobchójźenju pśez Ljouwert. Šarlota Kušcyc (2) / Lucas Netter FUEN (2) 
Z Ljouwert/Leeuwarden. Wót 2. až do 5. julija su se zastupnice a zastupniki mjeńšyny FUEN kupki „Non-Kin-State“ zmakali we Fryslân (we Friziskej w Nižozemskej) na 10. lětne zejźenje. W głownem měsće pódwjacornych Frizow, Ljouwert, jo gósćinaŕska organizacija De Fryske Beweging wuwitała reprezentěrujucych mjeńšynow z cełeje Europje.
W kupce a we FUEN se angažěrowaś, jo móžno pśez organizaciju, kótaraž zastupijo ako rědowny cłonk zajmy swójej mjeńšyny w reprezentatiwnej wašni. Ale teke jadnotliwe wósoby mógu swój input daś ako spěchowańske cłonki.
Ako kupka mjeńšynow bźez maminego stata jo se źěłowa kupka „Non-Kin-State“ 2017 w Romje załožyła a ma 43 cłonkojskich organizacijow. Cel źěłoweje kupki jo, wósebne nastupnosći a wupominanja mjeńšynow diskutěrowaś a nazgónjenje wuměniś.
We fokusu 10. lětnego zejźenja jo stojało pšašanje: Kak mógu mjeńšynowe rěcy widobne byś w digitalnem rumje?
Pśi prědnych rozgranjach mjazy mjeńšynami stwórtk wjacor jo se južo pokazało, až problemy a situacije su wjelgin pódobne, teke gaž rěcna situacija mjeńšynow jo wjelgin wšakoraka.