Z Města/Cottbus. „Łužyska filmowa pśeglědka – Łužiska filmowa přehladka – Lausitzer Filmschau“ jo była až do lěta 2021 kšuty wobstatk Filmowego festiwala Chóśebuz. Pó festiwalowem lěśe 2022 jo ten format bóžko pawzěrował. Ale 2026 jo se Łužyska filmowa pśeglědka wrośiła! Rozmjej ako samostatne zarědowanje w ramiku Kinowych nocow pód gołym njebjom w Chmjelowje, na tamnem Naměsće Arnošta Muki – organizěrowane wót Wobydlaŕskego towaristwa z.t. Chmjelow w kooperaciji z Filmowym festiwalom Chóśebuz. Wobydlaŕske towaristwo jo dostało tek spěchowanje w ramiku Kulturnego spěchowanja města Chóśebuz, ako jo pśewjeźenje zarědowanja zmóžniło. Tak jo se młodym filmaŕkam a filmarjam z cełeje Łužyce zasej wuběrna móžnosć bitowała, swóje ideje a swój talent prezentěrowaś.