Towaristwo k zdźaržanju wjelerakosći wužytnych rostlinow (VEN) jo wuzwóliło łopjenaty kał („Blattkohl“, k tomu słušaju wšake sorty ako na pśikład wuchacowy kał) k zeleninje lěta 2025/2026. Tak jo se Nowy Casnik raz z młodeju serbskeju gjartnaŕku Maju Šram do rozgrona dał – wó takem łopjenatem kale. Naźejnje sćo cytali prědny źěl teje serije w slědnem wudaśu. Něnto źo dalej!

Na co musymy źiwaś, gaž kublomy kał w swójom gumnje?

Maja Šram: Wšykne sorty kała trjebaju wjele gnojidłow. Nimski dajo za to zapśimjeśe „Starkzeh- rer“ – wóni maju pótakem wusoku pótrjebnosć za seśeńskimi srědnosćami. Na to musy se teke pśi zemi źiwaś, až jo na carobinach bogata. My w Rudnej wužywamy za pó-gnojenje kała stłane, schnjone krowjece paty. Ten gnoj ga njedejał byś pśewótšy za te rostliny.

Wjelgin wažne jo teke: Njesmějoš na samskem pólu ned zasej kał sajźaś, ale pólo trjeba sedymlětnu pawzu wót kała. Wacej mógali chórosći ten kał wobłapiś. Gaž njecakaš tych sedym lět, pón jo to na swójske riziko, móžoš gluku abo njedaru měś z nowym kałom.