Ze Slěpego/Schleife. Ewangelska wejsna cerkwja w Slěpem dej skóro nowe orgele dostaś. To pódšmarnjo kantor a cerkwiny muzikaŕ Björn Sobota w aktualnem amtskem łopjenje slěpjańskeje gmejny. Něntejšne orgele póchadaju z lěta 1949. „Pśi tencasnem pśetwarjenju jo se material trantawow (Pfeifen-Material) pśewažnje z wobstatka źěłaŕnje orgele twarjeceje firmy „Eule“ z Budyšyna nowo zestajał“, rozjasnijo kantor. „Wjele trantawow jo mjeńšeje kwality, wótere registry su se wócywidnje z rozdźělnych registrow zestajali. K tomu pśiźo dalšny problem: w górucych, suchych lěśach rywaju pśecej zasej drjewowe źěle z togo wobłuka, kótaremuž se groni ,Windlade’…. Wužywane materialije – mjazy drugim teke plasta (Kunststoff) – kaž teke techniske zwopšawdnjenje z pówójnskego casa se njespójźiju ze źinsajšnymi pominanjami a klimatiskimi wobśěženjami.“

Mjaztym su se teke někotare fachowe firmy za twarjenje orgelow ten instrument w slěpjańskej cerkwi dokradnjej woglědali. Wóni něnto kradosćiwje wulicyju kosty. Facit jo, až cełkowne kosty budu wušej 300.000 euro.