Te pilne pomocnice a pomocniki se zgromaźiju na Alfreda-Janigkowem-naměsće, źož teke stoj kóšnojski majski bom. Pitśku wótlažany stoj ten bom małego wejsnego źěla.

Z Běłeje Górki/Neu Byhleguhre. Jano 60 luźi bydli we wejsnem źělu gmejny Běła Góra-Bělin Běła Górka a weto jo małke zgromaźeństwo stajało majski bom. A to z wjelikim wjaselim.

Južo w tyźenju pśed swěźenjom su wobydlarje a wobydlaŕki zachopili wšykno pśigótowaś za wjeliki wejsny event. Bom ze zachadnego lěta su muske nowo barwili. Sobotu, źeń pśed stajanim boma, jo 20 wejsanarjow a wejsanaŕkow girlandu a wěnc wiło. Wše su se zgromaźili na dwórje jadneje wobydlaŕki a tam su w rědnej runźe a z pilnymi rukami wšykno platli. Nejmłodša pomocnica jo była pśi tom akle styri 4 lěta stara. Tak dawaju te luźe z Běłeje Górki wšykne tradicije wót jadneje na drugu generaciju dalej, aby serbske nałogi zdźaržali.