Towaristwo k zdźaržanju wjelerakosći wužytnych rostlinow (VEN) jo wuzwóliło kał k zeleninje lěta 2025/2026. Ale nic kuždy kał jo měnjony, ale specielnje take sorty, za kótarež dajo w nimskej rěcy pógromadne zapśimjeśe „Blattkohl“. Pla takich łopjenatych kałow se te łopjena direktnje žněju a pśigótuju. Kały, kótarež twórje kšutu głowu, ako běły kał abo cerwjeny kał, k nim njelice. Nejwěcej znaty łopjenaty kał jo zeleny kał ( serbski se jomu teke groni wuchacowy kał). Dalšne łopjenate kały su na pśikład carny kał a tak pomjenjony nimjerny kał (Ewiger Kohl). Samo kulrabij jo łopjenaty kał, wšak se lěbda wužywaju jogo drogotne łopjena, město togo pśedewšym jogo zgusćony kołk.

Z wuznamjenjenim ako zelenina lěta (respektiwnje dweju lětowu) dej se wěcej zajmowanosći chyliś na wjelerakosć a wuznam teje tradicionelneje kulturneje rostliny, kótaraž se jě južo wót młodokamjeńtneje doby a kótaraž jo była wósebnje w srjejźowěku wažne, we wjele regionach Europy kultiwěrowane zakładne zežywidło.