Z Barlinja/Berlin. Zwězkowy sejm jo stwórtk tyźeń wobradował kazń za realne labory (Reallaboregesetz) a ju wobzamknuł. Z teju kaznju deje nowe technologije, póstupowanja a wobchodowe modele se pód realnymi wuměnjenjami pśespytowaś/wuproběrowaś. Nastupajucy Net Zero Valleys (modelowe regiony, kenž se wutwariju ku klimje pśichylonym pioněram za zawóstajece industrije a zelene technologije – Łužyca jo prědny taki region w Nimskej) jo Zwězkowa frakcija zwězkozelenych stajiła póžedanje, až se na nje wuraznje glěda w kazni za realne labory, aby se eksplicitnje ako pady nałožowanja pomjenili. Póžedanje jo se wótpokazało.