Z Dešna/Dissen. Wjele zarědowanjow jo se slědny kóńc tyźenja dla górcoty wótpowěźeło. Hynac pak jo to było w rěcnem gnězdźe w Dešnje. Skóńcny swěźeń za tśeśi lětnik Zorjow jo se wótměł, jo se wšak dwě góźinje pózdźej zachopił. Lubosnje su wobźělniki tśeśego lětnika rěcne gnězdo na Zaźěwic dwórje wugótowali. Wužywało jo se kuždy chłodny a chłodkojty flak. Južo w toruzu jo było móžno, sebje sobu wześ button abo se wuproběrowaś w serbskem kwisu. Tak su wósebnje zachopjeńkarje mógli zwěsćiś, kak wjele južo rozměju. Dalej jo to šło pśi muri a pśi pówušonych grědkach. How jo było wšake natwarjone – basenki z wódnymi grajkami, jama ze zakšywadłow, źož su gósći mógli tšojeńka słuchaś, něco mólowaś a kreatiwne wordowaś.