Z Běłeje Góry/Byhleguhre. Z wejsneje chroniki zgónijośo, až su w Běłej Górje raz babki byli, kótarež su wjelim źiśam na swět pomagali. Tam cytaśo tek wó legenźe mjazy babkami, wó „Kušyc śośe“ (,,Kuschys Muhme“) – to jo była Maria Nowakowa (Noack, roźona 1838). Wóna jo w běgu swójich 53 pówołańskich lět až krotko pśed jeje smjerśu se wó wušej 1.500 póroźenjow starała. Ze skóro 94 lětami jo wóna 11. apryla 1932 w Běłej Górje zemrěła. Pó njej jo Koncakojc śota (Tante Konzagk) abo Anna Theuergarten – tež znata ako „bóśonowa maś wót Běłeje Góry“ – pśi póroźenjach pomagała. Ako su dnja 13. apryla 1970 Koncakojc śotu wołali k póstoli póroźujuceje, jo to było to slědne naroźenje w Běłej Górje, tak se wulicujo teke źinsa hyšći.

Pó dłujkem cakanju, pó 56 lětach, dajo w Běłej Górje něnt zasej babku. Luisa Fröhlichojc, młoda žeńska z Běłeje Góry, jo tśi a poł lěta „babkowe wědomnosći“ studěrowała. Jo bachelor wuspěšnje absolwěrowała a pśewzejo něnto nadawki babki.