Wónej stej byłej wjelgin spokojom z turněrom: Górjański šołta Frank Engelking a Fred Kaiser, nowy pśedsedaŕ „Serbskich koparjow“.Górjański šołta Frank Engelking jo turněr wótwórił a wšykne mustwa we swójej jsy wutšobnje wuwitał. Fota: H. Adam (5) / K. Fidekowa (4)

Z Gór/Guhrow. Na rědnem sportnišću na Górach cesto „balo kopju“. Zgromadne mustwo Smogorjow/Góry ga tam nastupijo k swójim graśam we wokrejsnej klasy. A teke tam za to treněruju, zwucuju.

To, což pak jo se tam slědnu srjodu, 3. junija, stało, njejsu tam hyšći žednje dožywili. Źiśi ze wšakich šulow su tam cełe dopołdnjo „lětali“ z balom. Wuknice a wukniki, ako wuknu we swójich šulach serbsku rěc – a to wósebnje we Witaj-wucbje –, su se na Górach zmakali. To nic na někakej „Olympiaźe serbskeje rěcy“, ale su swóje mócy měrili w balokopanju.