Ze Čornego Chołmca/Scharzkollm.Pónjeźele, 8. junija, jo se wótměło w Krabatowem młynje w Čornym Chołmcu dalejkubłanje na pólu kultury. Pśepšosyłej stej projekta DOMPRO (Domowina Dolna Łužyca projekt tzwr.) a ZARI (seś za serbsku rěc a regionalnu identitu). Něźi 60 cesnoamtski abo głownoamtski statkujucych kulturnikow z Dolneje a Górneje Łužyce jo se wobźěliło. Za tym až jo jadnaŕ Krabatowego młyna Anton Fuchs jich pó młynje wjadł a jim wó terenje wulicował, su slědowali pśednoski. Sobuźěłaśeŕ DOMPRO Michael Apel jo wó tom referěrował, co jo trjeba pśi organizaciji zarědowanja, wósebnje glědajucy na dowólnosći. Teke muzika na zarědowanjach a wótpowědne pšawo za to (GEMA) bu tema. Dalej jo Walter Schönebröcher, fotograf a filmaŕ z Chóśebuza, zajmcam móžnosći wužywanja lokalneje kumštneje inteligence (KI) za źěłabnosć kulturnikow pśedstajił. Jadwiga Bryckec wót projekta ZARI jo informěrowała wó tom, kak se w jadnotliwych wokrejsach wó strowotniski pas procuju. Doglěd do serbskeje kulturneje sceny jo dał Pětr Brězan, pśedsedaŕ Zwězka za serbski kulturny turizm.