Z Budyšyna/Bautzen. „Please, look at me ...“ jo se pšosyło swětkowny kóńc tyźenja w zwucowańskem zalu Serbskego ludowego ansambla (SLA). Tam jo był znaty modowy fotograf Mario Testino gósć – jo pśichwatał z Londona do Budyšyna.

Mario Testino jo pó słowach casnika „Die Zeit“ nejznatšy modowy fotograf swěta. Z tym jo se kněžyło w Serbskej kulturnej informaciji (SKI) wjelika napnětosć, ako jo tam kóńc februara togo lěta njezjapki asistent fotografa zazwónił. Pśi telefonje jo wón zdźělił, až co fotograf ned zachopjeńk měrca do Łužyce pśijěś a fota wót Serbow zgótowaś. Fotograf štycy tuchylu wesrjejź projekta, z kótarymž pokažo swět a jogo mjeńšyny kaž teke etniske kupki. Južo 19 lět dłujko wón slěźi za kupkami, kótarež maju swójsku drastwu a ju sebje tek waže. We wšakich krajach wót Mongolskeje do Mexika jo wón južo ducy był a jo zgromaźił wobraze za swóju galeriju, kótaruž pokazujo tuchylu w Plazzo Bonaparte w Romje.