Z Města/Cottbus. Dnja 21. maja jo se to měsćańske kólasowanje oficialnje zakóńcyło. Se wě, wšake wót nas tak a tak pśisamem kuždy źeń kólasuju abo rad gótuju wulěty z kólasom, pótakem źo to dalej. Nowa app dowólijo něnto teke zwenka casa wuběźowanja swóje tury za sebje składowaś a kilomejtarje licyś.

W tom lěśe w Měsće jo se raźiło doněntejšne rekordy pśewušyś, licba kólasarjow jo była wětša, ak do togo, a teke licba tych nakólasowanych kilomejtarjow. Teke naš team „Serbske kólasarje“ jo wjelgin derje wótrěznuł: Z pěśnasćo aktiwnje kólasujucymi smy nawjerśeli 3.159 km a se na 41. městnje placěrowali. Gaž mysliš, až pódla su byli kupki z wušej 200 luźimi, jo to južo něco. Prědne městno jo dobył team „Max-Steenbeck-Gymnasium“ z 57.570 km a 291 kólasarjami. Team „Dolnoserbski gymnazium Chóśebuz“ jo był šesty.