Z Pólskeje/Pólska. Dr. Justina Michniuk glěda slědk na intensiwnu a wuspěšnu pśednoskowu turu pó wózjawjenju swójich knigłow „Tradicije a nałogi Serbow w Dolnej Łužycy“ (Novae Res 2025). Wót wujźenja edicije w septembrje 2025 jo se wótměło dogromady dwanasćo zmakanjow z cytarjami na jadnasćo wšakich městnach w Pólskej ako teke jadno online-zarědowanje. Zwjaseleca rezonanca jo pokazała wobstawny zajm za kulturu a stawizny Serbow w susednem słowjańskem kraju.

Zarědowanja su gromadu zwołali luźi wšakorakich generacijow a socialnych slězynow. Dogromady jo se wobźěliło wěcej ako 500 zajmcow na zmakanjach z dr. Michniuk, na kótarychž jo šło wósebnje wó serbsku kulturu a tradicije. Zwjaselece jo teke pśedawański wuspěch knigłow: Wót nakłada 300 eksemplarow jo se dotychměst 252 pśedało.

Dalšny wjerašk jo był swětocne wótwórjenje fotoweje wustajeńce dr. Justyny Michniuk dnja 16. maja 2026 w Muzeju Opolskeje Jsy w Opolu. Wustajeńcu jo oficielnje wótwórił kněz prof. Piotr Pałys. Wón jo wusoko gódnośił etnografiske wědomnostne źěło awtorki k serbskej kulturje a tradiciji.