Z Drježdźan a Budyšyna/Dresden und Bautzen. Docynjone jo: Pěte dojadnanje wó financowanju Załožby za serbski lud za lěta 2026 do 2030 jo wót Zwězka, Sakskeje a Bramborskeje pódpisane a bu załožbje wałtoru tyźeń oficialnje w sakskem statnem ministaŕstwje za wědomnosć, kulturu a turizm (SMWK) pśepódate. Z tym se pówušyjo cełkowne spěchowanje lětosa na něźi 29,3 milionow euro. Pjenjezedawarje se rozdźěluju sebje toś tu sumu ako doněnta (Zwězk: 14,628 milionow euro, to jo 50 procentow; Sakska: 9,752 milionow euro, 33,33% a Bramborska: 4,876 milionow, 16,67%. Kaž jo direktor załožby Jan Budar informěrował, jo to napśeśiwo 2025 drje pówušenje pśipłaśonki wó 5,34 milionow (wót 23,916 milionow), ale praktiski njejo skok tak wjeliki. Wšako jo załožba 2024/25 stupajuce wudawki z rezerwy financěrowała, kótaruž jo w lětach 2020 do 2023 nagromaźiła. Jano łoni jo było tomu 4,8 milionow euro.