Fotografije tśich fotografow wise w nutśikownem měsće Baršća, tek w tamnej bibliotece. Wóni pokažu łužyske krajiny a serbske nałogi. Janšojski muzej jo pśi wótwórjenju w bibliotece informěrował wó módrośišću. Fota: K. K. 
Z Baršća/Forst. Nutśikowne město Baršća jo mjaztym tśeśe městno, na kótaremž se drogujuca wustajeńca „Pśez lěto carnoběłe & w barwje“ pokažo. We wšakich lodach a pśi dalšnych sobustatkujucych na „foto-sćažce“ pó cełem nutśikownem Baršću jo wěcej ak 60 wšakorakich fotografijow Heinera Stephana, Andreasa Batkego a Franka Wenzela wiźeś. Wótwóriła jo se ta wustajeńca 8. maja w Měsćańskej bibliotece Baršća, źož wjele tych fotografijow wisy.
Mjaztym až su fotografije Heinera Stephana połne intensiwnych barwow a dynamiske, se zdaju carnoběłe wobraze Andreasa Batkego casy śmojte, pówažne, maju wěstu dłym. Cele hynakše su zas wobraze Franka Wenzela z Bórkow. Jogo woko se njeměri na serbske nałogi a luźi, ale do pśirody. Pśez intensiwnu barwu pla njogo na pśikład mech se swěśi abo se jadnoraznje zapópadnjo „źěło“ bobra na bomach.