Z Janšojc/Jänschwalde. Wutšobnemu pśepšosenju wósadneje cerkwineje rady Janšojce k tradicionelnej namšy pód gołym njebjom na kjarchobowem dwórje we wobłuku Dańskich łukow (Lasszinswiesen) jo wjele woglědari slědowało. Dopołdnja na tom stupnem stwórtku su se wótměnili słyńco a tłuste mrokawy, togodla su se te gibate cłonki cerkwineje rady wó to starali, až jo se dwórowa brožnja tamneje Nagola Re GmbH skrotka pśefunkcioněrowała do cerkwineje rumnosći z wupyšnjonym hołtarjom.

Muzikowy ramik jo librował dujaŕski chor teje „Allianz“ z Města, ako jo faraŕ Kurt Malk z Picnja pśewjadł namšu, pśi kótarejž wón jo teke lětosnych šesć konfirmandkow pśedstajił. Te źowća z Janšojc, Radowize a Barbuka su wó tom pśemyslili, co jim wóznamjeniju do-njebja-stupjenje (Himmelfahrt), górjejbranje a wěra. Swóje mysli k tomu a teke, kótare hobbyje maju, to su na A4-łopjena pisali a su je na sćěnje brožnje pśicynili. Wóni su pśednjasli Pósołske statki (Apostelgeschichte) a jaden psalm.