Z Drježdźan/Dresden. Za tym, až su Bramborska, Sakska a Zwězk to 5. financne dogrono za Załožbu za serbski lud (za lěta 2026 do 2030) dojadnali a za tym, až su jo wogano pódpisali zwězkowy nutśikowny ministaŕ Alexander Dobrindt, bramborski ministaŕski prezident Dietmar Woidke a sakski ministaŕski prezident Michael Kretschmer, jo se wóno skóńcnje mógało pśepódaś. To jo se stało ten tyźeń wałtoru w Sakskem statnem ministaŕstwje za wědomnosć, kulturu a turizm (SMWK) w Drježdźanach. Franciska Brech (wjednica wobłuka kultura a turizm kaž teke zagronita Sakskego kněžaŕstwa za nastupnosći Serbow), Tobias Dünow (statny sekretaŕ za wědomnosć, slěźenje a kulturu kraja Bramborska a zagronity za nastupnosći Serbow w Bramborskej) tak ako Hans-Leo Dirks (wjednik referata Mjazynarodne mjeńšyny w Nimskej a Europska mjeńšynowa politika w Zwězkowem nutśikownem ministaŕstwje) su pśepódali kopiju dogrona na Jana Budarja, direktora Załožby za serbski lud.