Z Groźišća/Grötsch. Teke naša mała wjas Groźišćo co se wobźěliś na wuběźowanju wó nejrědnjejšy majski bom. Smy stajili naš bom 1. maja, wón ma wusokosć wót 21 metrow.

Južo do togo jo wjednica groźišćańskeje domowinskeje kupki, Christa Halkowa, w Lodce w Chóśebuzu nowu serbsku chórgoj a banśiki w serbskich barwach wobstarała, dokulaž stare su byli wšykne wóttrjebane.

Dnja 28. apryla wótpołdnja su se někotare muske ze jsy zmakali, aby dłujki štom majskego boma z fryšneju běłeju barwu namólowali. Źeń pózdźej su jěli pó zelene gałuzki do góle, material za wiśe wěnca. Su teke źěru za štom wuryli.

Pótom jo se zmakało 13 žeńskich ze jsy k wiśu girlandy za wěnc. Smy teke južo pisane banty na wěnc pśiwězali. Ako smy wili girlandy, smy samo spiwali „Anka, buź wjasoła“.

Na dnju stajanja majskego boma jo było pśisamem ceła wjas na nogach. Muske su njasli bom k městnu stajanja. Štom su z girlandu wobwili, serbsku chórgoj su pśibili, teke fryšnu młodu brjazku na špicu štoma. Wu nas wisy jano serbska chórgoj, mamy cysty serbski majski bom.