Na kótare temy majskego wudaśa Płomjenja mógu se źiśi wjaseliś?

Zawěsće nadpadnjo cytaŕkam a cytarjam Płomjenja, až pśiroda stoj w srjejźišću nowego wudaśa. Nic jano pśi nadawkach a gódańkach grajo wóna rolu, ale teke w artikelach. Tak zgónijomy w seriji ku gójeńskim zelam a rostlinam našeje domownje wjele zajmnego wó mlacu (Löwenzahn) a awtorka Justyna Michniuk ma za nas teke tśi jadnore recepty z mlacom. W drugem artikelu zeznajomy bližej měchowe sykorki (Beutelmeise). Te ptaški twarje filigrane gnězda w formje měškow, což teke na wjelgin rědnych fotach wiźimy. Ptaški njepózmakajomy wjelgin cesto. Wóni su wót wótemrěśa wobgrozone, ale awtoroju Andreasoju Baumgärteloju jo se raźiło te wósebne ptaški a jich gnězda fotografěrowaś. A wó rědnosći pśirody pišo teke wuknik Dolnoserbskego gymnaziuma. Wón jo bydlił w Bórkowach a wopisujo, co jo se jomu we tej jsy wósebnje spódobało.

Namakaju źiśi teke wulicowanje w casopisu?