Z Města/Cottbus. Rědko jo publikum wuměłcow južo pśed pśedstajenim programa z mócnym pśiklaskom wuwitał, ale njeźelu wjacor, w derje połnjonem chóśebuskem Statnem źiwadle jo se take něco stało. Serbski ludowy ansambel (SLA) jo pśepšosył na oratorium „Nalěćo/Nalěto“ z orchestrom pód nawjedowanim dirigentki Katharina Dickopf, ze solistami Daniela Hazec (sopran), Stephanie Hauptfleisch (alt), Patrik Horňák (tenor) a Clemens Heidrich (bas) a z chorami SLA, Meja, Lipa, Budyšyn a Łužyca. Něźi 120 sobustatkujucych a 45 gercow orchestra jo južo pětk, w Tachantskej cerkwi swj. Pětra w Budyšynje a sobotu w Lutherowej cerkwi w Drježdźanach pśiglědarjow zagóriło. W Chóśebuzu jo jadnab 450 woglědarjow se tym něźi 160 sobustatkujucym z wěcej minutow trajuceju stojeceju owaciju źěkowało. Wěcej razow su widobnje gnute dirigentka, solisty a wjedniki doprědka stupali, aby chwalbu publikuma pśiwzeli. A nagromadu jadnab 1600 woglědarjow jo wšuźi akterow oratoriuma z tšojneju „Sławu“ za gnujuce pśedstajenje mytowało.