Z Hochoze/Drachhausen. Južo w slědnem wudaśu Casnika smy krotko wó premjerje muzikowego kusa „Mój bog, Floppy Dolls su zasej slědk!“ rozpšawili, kótaruž su grajaŕki a grajarje Nimsko-serbskego ludowego źiwadła Budyšyn (NSLŹ) w Hochozy pśedstajili. Rowno tak, ako w „Złośanem plonje“ jo jadnorazna a seksy band Floppy Dolls njeźelu wótpołdnja publikum w brjazyńskem balowem domje „Eiche“ ze swójim muzikaliskim programom z woblubowanymi šlagerami serbskego radija a znatymi mjazynarodnymi hitami zagóriła. Pśiglědarje su pśeraźili, až njejsu w Brjazynje polonezu rejowali kaž w Hochozy, ale teke njejsu jano sejźeli a pśisłuchali. Ně, wóni su pilnje sobu klaskali a spiwali a samo pominali pśidank. Floppy Dolls su ned dwa spiwa hyšći raz zgłosyli.