Z Města/Cottbus. Delegacija Zelenych wótpósłańcow z krajnego sejma Nordrhein-Westfalskeje (NRW) jo se zmakała slědny tyźeń pónjeźele pśi Chóśebuskem Pódzajtšnem jazorje z regionalnymi akterkami a akterami. Ducy jo ta delegacija, aby se informěrowała wó šansach a wupominanjach strukturneje změny w něgajšnych brunicowych rewěrach.

„Wuměna z Łužyce ma za nas w NRW wjeliki wuznam. Teke gaž geologiske wuměnjenja su hynakše, móžomy z cystego žrědła (aus erster Hand) wuknuś, kótare wupominanja pśi pówódnjenju něgajšnych wuglowych jamow se pokažu – glědajucy na pšašanja wěstosći a rukowanja (Haftung) ako teke wódogóspodaŕstwa. Toś te nazgónjenja musymy zacasa do našych planowanjow w Rheinskem rewěrje zapśěgnuś“, jo groniła Antje Grothus, wótpósłańcka krajnego sejma NRW a něgajšny cłonk Wugloweje komisije, w kótarejž jo zajmy wót górnistwa pótrjefjonych zastupiła. Teke tam w Rheinskem rewěrje w NRW deje se w pśiducych lětach wjelike wuglowe jamy z wódu połniś.