Luka Golinski, cłonk Kolektiwa Wakuum za serbsku (sub)kulturu a wuměłstwo a tuchylu student wizuelneje komunikacije na UdK w Barlinju, jo se starał wó wugótowanje wobalki aprylowego Rozhlada. Titelowy wobraz jo digitalna fotografija „Cołnaŕ“, ako jo nastała w ramiku studija w zgromadnem źěle z Klemencom Bobku. Dalej k twóŕbje zgónijomy: „Cołnaŕ na kwěrnu, radosnu wašnju reinterpretěrujo błośańskego cołnarja, inspiracija stej byłej m.dr. šwulny ilustrator Tom of Finland a kwěrna kóžana subkultura. Twóŕba slědujo teke artikloju Jo Serbstwo seksi dosć? Měta Nowaka a se pśizamknjo žycenju za wěcej kwěrnym wjaselim a sebjerozwijanim w serbskem konteksće.“ Teke pśedsłowo jo Luka Golinski tomu Rozhladoju pśinosował. Wón namakajo wjelgin dobre słowa za to, kak „nimske wócy wubuźiju sromnosć“. „Toś ta sromnosć jo štycała w serbskich familijach, ako ze źiśimi njejsu powědali w swójej maminej rěcy, aby źiśi njedostali w šuli kij na palce.“ A efekty tych „nimskich wócow“ dalej statkuju – jo dalej ten nadawk, něco na tom změniś.