Z Města/Cottbus. Team wót „Lausitziade“ póbitujo za lětosne wudaśe projekta „Mója wěc jo, AKO ju łapijom/Meine Sache ist, WIE ich sie fange“ wulicowańsku źěłaŕnju pód titelom „Luźe, bajki, mentality“. Dej wó to hyś, se zaběraś z traděrowanymi tšojenjami/powěsćami/bajkami z Dolneje Łužyce a teke z (awto)biografiskimi tšojenjami how bydlecych luźi – a je wulicowaś. Daś zajmce se na tśich kóńcach tyźenjow zanuriju do wuměłstwa lichego wustnego wulicowanja, pśi tom zwězujucy regionalne powěsći z biografiskimi dožywjenjami, anekdotami a perspektiwami wót witśejšego.

Wulicowaś móžośo w serbskej, nimskej, engelskej a kuždej drugej rěcy. Daś se wułušćijo, kak wjelerako klincy Łužyca. Pśedznaśa njejsu za wobźělenje notne.

W juliju budu te tšojenja źěl programa „Mója wěc jo, AKO ju łapijom 2026“ – na jawišću abo na marku móžnosćow.