Z Města/Cottbus. Drastwa jo wjele wěcej nježli luta dekoracija – jo widobne znamje za pśisłušnosć. Jo pśi tom dopomnjenje a rownocasnje pśibytnosć. A kak wjelgin jo ze žywymi, jadnoraznymi luźami a modernymi móžnosćami zwězana, to pokažo nowa wustajeńca „Kšasne drastwy – Lubowane tradicije /Trachtvoll – Geliebte Tradition“, kótaraž jo se wótwóriła sobotu we Wuměłstwowej hali Łužyca. We Wjerbnje, na Górach a wokolinje jo nastało 20 wjelikoformatowych fotografijow, na kótarychž jo we Wjerbnje bydlecy fotograf Thomas Goethe zapópadnuł žeńske rowno tak ako muske(!), młode a starše – luźe z Łužyce, ako serbsku drastwu z gjardosću a radosću nose. W korona-casu jo wón zachopił z tym projektom, kótaregož realizacija jo se pśez spěchowanje wót Załožby za serbski lud zmóžniła.