Z Lipska/Leipzig. Lětosne lipšćańske knigłowe wiki su se njeźelu skóńcyli z rekordom woglědarjow. Nagromadu jo se licyło – inkluziwnje pó cełem měsće wugótowanego festiwala „Lipsk cyta“ – 313.000 gósći, to groni wó 17.000 wěcej ak łoni. Cełkownje jo se prezentěrowało na pó pódaśu zarědowarja „nejwažnjejšem nalětnem zarědowanju branže“ 2.574 wustajarjow ze 54 krajow. Pó słowach jadnarja knigłowych wikow Martin Buhl-Wagner jo se z tym glědajucy na mjazynarodnych wobźělnikow jaden nowy rekord dojśpił.