Njeźelu, 1. měrca, su pśebywali wusoke cerkwine gósći ze šwedskego Göteborga a šwedskeje wósady w Barlinju w cerkwinem wobceŕku Barlin-Bramborska-šlazyńska Górna Łužyca, a to na pěś městnach. We pódpołdnjowej EKBO su se za to wuzwólili Chóśebuz a Bórkowy. W Chóśebuzu jo namšu nawjedowała generalna promštowka Theresa Rineckerowa a prjatkowała jo šwedska biskupka Susanne Rappmanowa. Pón jo se toś ta kupka teke pódała do Bórkow, źož jo namšu nawjedował superintendent Georg Thimme a prjatkował jo w šwedskej rěcy superintendent Tomas Philipson. Toś ta gnujuca dwójorěcna namša jo se swěśiła w derje wobsajźonem bórkojskem wósadnem domje. Pótom jo kněz Budyšin we cerkwi pokazał na wósebne zajmnostki a jo mjazy drugim teke wulicował wó wěstych městnach serbskich familijow a wó něgajšnych serbskich a nimskich namšach.