Z Husa/Maust. Pśi kšasnem słyńcu a spódobnych 12 stopnjach Celsius su sobotu, 28. februara, w Husu – źěl gmejny Gatojce – swój 126. zapust swěśili. Zmarznuś njejo ten źeń nichten musał. Ale lušt, zymu dokóńcnje wugnaś, jo był wjeliki.

Swěśili su Husanarje w gmejnskem centrumje Hus. Wobźěliło jo se 15 pórikow a 6 źiśi. Pó wótwórjeńskej reji a pśedstajenju pórikow su zeger 13:00 z gmejnskego doma wumaršěrowali. Pśewóźone wót „Spree-Neiße Musikanten“ su śěgnuli pó jsy, pśi comž su zastali pśi sponsorach a gmejnskich zastupnikach. How su rejowali a žwatorili.

Wjacor su zapustarje se wrośili do gmejnskego doma, źož jo cakał kuchaŕ Ronny Kuhlmann z Noweje Jsy z wjacerju. Wót zeger 20:00 jo kupka „Dreiklang“ z muziku do reje wabiła. Njeźelu dopołdnja su se někotare cłonki Wobydlaŕskego a tradiciskego towaristwa Hus zasej w gmejnskem domje zmakali, pśeto jo na programje stojało, how zrumowaś a rěšyś. Dnja 8. měrca jo se ta rumnosć ako lokal za wuzwólowanje krajnego raźca wokrejsa Sprjewja-Nysa wužywała.