Z Pódstupima/Potsdam. Zajźonu srjodu stej bramborski ministaŕski prezident Dietmar Woidke (SPD) a CDU-šef Jan Redmann koaliciske dogrono mjazy SPD a CDU pśedstajiłej. Dla napněteje financielneje situacije stoj za nowe kněžaŕstwo źaržanje w fokusu. Dla togo planujotej koaliciskej partnarja pšawidłownje wobradowaś, aby mógałej napšawy zacasa pśiměriś na se změnjujucu situaciju.

Kaž w starem koaliciskem dogronje mjazy SPD a BSW pśiwobrośijo se w nowem dogronje wót SPD a CDU jaden wótstawk serbskemu ludoju, kulturje a rěcy. Ten jo w pśirownowanju z pjerwjejšym dogronom krotšy ale konkretnjejšy wupadnuł. SPD-CDU-koalicija pišo, až buźo hyšći we tom lěśe wukubłanje serbskich ceptarjow na BTU Chóśebuz-Zły Komorow zachopiś, až buźo kraj Bramborska to serbske dalej wobšyrnje šćitaś a zgromadnje ze Zwězkom a Lichotnym statom Sakska Załožbu za serbski lud dalej spušćobnje financěrowaś. Mimo togo co nowa koalicija regionalnu rěc dolnonimšćinu šćitaś a digitalny rěcny atlas za tu rěc wuwijaś.