Z Města/Cottbus. We wobłuku 36. Bramborskego žeńskecego tyźenja se wugótuju wšake zarědowanja, kótarež su wěnowane wuznamnym a skobodnym žeńskim zajźonosći a pśibytnosći. Stwórtk, 5. měrca, stej kazałej Rosa Luxemburgowa załožba z.t. a župa Dolna Łužyca z.t. do Serbskego doma w Měsće na pśednosk a rozgrono wó serbskej šlodaŕce a wušywaŕce drastwow Pawlinje Krawcowej, ako jo zjawnje wustupiła pśeśiwo nacistiskemu režimoju.

35 gósći – mjazy nimi źewjeś muskich – jo pśichwatało na pśednosk dr. Pětša Šurmana a Martiny Nowakojc a se pśizamkujuce rozgrono. Historikaŕ, hyšći pśed krotkim pśi-stajony w Serbskem instituśe (SI), a kulturna wědomnostnica, něgajšna sobuźěłaśeŕka Serbskego muzeja w Měsće – wobej něnto na wuměńku – stej bejne lěta wusko gromadu źěłałej a slěźiłej. Stwórtk wjacor stej powědałej wó žywjeńskej droze Pawliny Krawcoweje a wó jeje wuznamje za serbsku kulturu.