Z Města/Cottbus. Kak by my mógali sebje serbski futurizm pśedstajiś? Z tym jo se intensiwnje zaběrała w Lipsku bydleca serbska wuměłcowka Karoline Krawcec (Schneider), a wuslědki jeje wuměłskego rozestajanja wiźimy w jeje wustajeńcy „jama: pśichod/Grube: Zukunft“, kótaraž jo se pětk, 20. februara, w Bramborskem krajnem muzeju za moderne wuměłstwo (BLMK) wótwóriła. We tom multimedialnem insceněrowanju se serbska tradicija nowo mysli, daloko pšec wót luteje folklory. Woglědarje mógu se pó wšakich tematiskich kapitlach tak ako na nadejźeńskem drogowanju pógibowaś a pśi tom dožywiś, kak se napšašujo kolektiwne spomnjeśe a kak se pokažu perspektiwy pśichodnych identitow, pśisłušnosćow a sebjereprezentacijow. Krawcec jo swójske serbske kórjenje ako wuchadnišćo wzeła, ale njejo se na to wobgranicowała. Jeje wustajeńcowy projekt zgromaźijo w jadnom rumje symboliski nalodowane objekty w bogatej licbje, k tomu wideo-twóŕby, keramikowe twóŕby a Augmented Reality.