Z Města/Cottbus. Teke źiśi chóśebuskeje Witaj-źiśownje „Villa Kunterbunt“ njejsu w zymnem, sněgowatem januarje skomuźili, ptaški futrowaś a se na ptaškowu swajźbu pśigótowaś. Dnja 26. januara su swóju ptaškowu swajźbu ako „event“ direktnje we źiśowni swěśili. Te źiśi drugeje kupki („wuchacki“) su pokazali dwójorěcny program w pyšnych kostimach, z njewjesćinym pórikom w serbskej drastwje a z póbratšom. Jo to był interaktiwny program, pśi kótaremž su mógali te druge źiśi (te pśiglědarje) wjele sobu gótowaś.

A tak ako južo łoni jo źiśownja „Villa Kunterbunt“ swójo camprowanje zasej zwězało ze ptaškoweju swajźbu. W ptaškowych kostimach a zasej z njewjesćinym pórikom jo se wupórało dogromady 20 źiśi (młoge z drugeje kupki, młoge ze pśedšulskeju kupku) wałtoru, 10. februara, na wjeliku camprowańsku rundu. Woglědali su do Serbskego doma, „kleine Knappschaft“, GWC, spontanje teke ku „Cottbusverkehr“.

Lubosćiwje a pilnje pśigótowany program, kenž su pokazali, jo był – ako gronjone – měšańca ze ptaškoweje swajźby a camprowanja. K pówitanju su zgłosyli spiw „My witamy“.