Tam a zas se pokažu stadła jelenjow w bliskosći jsow błośańskego regiona – how na fośe pśi radušańskej Carnej góli. Wiźimej muskecej jelenja, ako pśisłušatej wětšej kupce (fotograf jo licył 12 zwěrjetow), a takej groni jagaŕ „Junggesellentrupp“. 
Nimska załožba za źiwe zwěrjeta (Deutsche Wildtierstiftung) jo wuzwóliła cerwjenego jelenja (cervus elaphus) ako zwěrje lěta 2026. Z tym dej se chyliś zajm na wuznam teje impozantneje zwěrjetneje družyny a na wupominanja, z kótarymiž ma w Nimskej cyniś. W online-wótgłosowanju jo se cerwjeny jeleń pśeśiwo hermelinoju a złotnemu šakaloju pśesajźił.
Cerwjeny jeleń jo nejwětšy pšawidłownje w Nimskej se pokazujucy cycak. Pó pówoblicenjach jo žywe něźi 220.000 eksemplarow na něźi běrtylu krajneje płoniny. Te zwěrjeta su žywe w socialnych strukturach, kótarež su kradu wótwisne wót roda. Žeńske (jelenice) pśebywaju ze swójimi śeletkami w stadłach, mjaztym až twórje muske (jelenje) zwenka ganjańskego casa swójske kupki. Typiske žywjeńske rumy su poł wótcynjone krajiny z łukami a bomowymi kupkami, ale dla pśiběrajucych cłowjeskich aktiwitow a góńtwy se wjele jelenjow pśecej wěcej do gólow slědk śěgnjo.
