Z Dešna/Dissen. Na rěcny pójědank su Zorjacki a Zorjaki pśe-pšosyli njeźelu do swójogo rěcnego gnězda na Zaźewic dwórje w Dešnje. Pilnje su wobźělniki rěcnego projekta warili kafej a tej, gótowali jajowy a „njajowy“ (mimo alkohola) liker a su pómazali skibki za gósći a zapustaŕki a zapustarjow. Se wě, až jo była serbska rěc wšuźi widobna. Na toflach z pórucenim, na małych šyldkach pśed talarjami ze skibami abo pśed blachami z dešańskim tykańcom. Cedliki z jadnorymi rěcnymi wobrotami z nimskim pśełožkom su zajmcow pśepšosyli, se w serbskej rěcy wuproběrowaś. Njeglědajucy na njespódobne a mokše wjedro jo jadnab 25 luźi w rěcnem gnězdźe narski na zapustowy pśeśěg dešańskeje młoźiny cakało. Aby cas pśekrotcyli a se tšošku wugrěli, su juž jadnu abo drugu serbsku štucku zespiwali.