Z Baršća/Forst. Pó-pšawem su kśěli cłonki wokrejsnego sejma Sprjewja/Nysa na swójom pósejźenju 18. februara etat za lětosa wobzamknuś. We njom se groni, až kśě 410.686.500 euro nabraś, wudaś pak muse 420.448.600 euro. Tak felujo we wokrejsnej kasy za lětosa 9.762.100 euro. Toś musy wokrejs zasej nowy kredit braś.

Wětšy źěl tych pjenjez, z kótarymž móžo wokrejs swóje winowatosći a nadawki społniś, pśiźo wót tych pjenjez, ako muse gmejny a města płaśiś na wokrejs (na nimski jo to „Kreisumlage“). Za to by musali komuny wót swójich nabrankow tenraz 44,7% płaśiś na wokrejs. To jo wěcej ako łoni, źož su wóni musali wótedaś na wokrejs „jano“ jadnab 22 procentow. Wšykne komuny we wokrejsu su take pówušenje rowno tak ako młoge cłonki wokrejsnego sejma wótpokazali. Su gronili, až njamógu pón komuny wěcej swóje nadawki społniś.