Glědajucy na pśeliš mokše wjedro njeźelu, jo se zaspustarjam na slědnem kóńcu tyźenja derje raźiło kšutu zymu wugóniś. Weto su wjasele swěśili, na pśikład sobotu, 21. februara, w Drjejcach/Drewitz z 25 pórami a jadnom žeńskecym pórom. Nowa Wjas/Neuendorf jo z 25 młoźinskimi pórikami a 18 źiśimi zapustowała. W Bobowje/Babow jo nagromadu 68 młoźinskich a staršych pórow pó jsy śěgnuło. A w měsćańskem źělu Šlichow/Schlichow su wóženjone, młodostne a małe, nagromadu 35 pórow, zymski nałog woplěwali.

Njeźelu, 22. februara, jo dešański/Dissener zapustowy pśeśěg z 27 pórikami teke k Zorjakam woglědał. Pór kilometrow dalej, w Gołbinje/Gulben, jo 35 młodych a staršych pórow se wobźěliło na zapustowem rušu. Radušańske/Radduscher su bejnje wjeliki zapust na nogi stajili, ga z 80 dorosćonymi a 19 źiśecymi pórami.