Sobotu, 7. februara, jo južo na pśede jsu parkujucych awtach wiźeś, až se něco wósebnego tšoj: Janšowarje swěśe 150. zapust!

Pśi wognjowej woborje zmakaju se póriki w serbskich drastwach. Nanejmjenjej 150 su kśěli byś – pśisamem dwěsćě pórow pśiźo. Kupka „Lausitz Blech“ a Strobicańske dujaŕske gerce pśewóźujotej jich na najs. Tam caka wjelike stajadło za zgromadne foto. Tśi kupki profesionelnych filmarjow, reportaŕka serbskego radija z mikrofonom, lajske a profijowe fotografy měšaju se mjazy wjelesy gósći ze jsy, blišeje wokoliny a zdaloka. Wše cakaju na swětosny pśeśěg, mjazy nimi krajny raźc Harald Altekrüger, pśedsedaŕ Domowiny Dawid Statnik a jadnaŕ Domowiny za Dolnu Łužycu Markus Kóńcaŕ. Moderator RBB Christian Mathée agěrujo pśed kameru za rbb-telewokno „Łužyca“. Mjazy drastwynosaŕkami póznajom Rosi Tšukowu, pśedsedaŕku tudejšeje kupki Domowiny, nejwětšeje w župje Dolna Łužyca. Škóda, až njamóžo to sobu dožywiś bóžko južo zamrěty sekretaŕ něgajšneje domowinskeje župy Gubin/Baršć, legendarny Maks Hantška ...