Ze Złego Komorowa/Senftenberg. Wałtoru, 3. februara, pótakem ku kóńcoju zymskego semestera, su studěrujuce na ceptaŕstwo wót Bramborskeje techniskeje uniwersity BTU na złykomorojskem campusu prezentěrowali projektowe źěła. Pšašanje za to jo było, kak móžo se to serbske tematiski integrěrowaś do wucby nimšćiny na zakładnych šulach? Zastupujuca profesorka Alina Dittmannowa a docentka Renata Shamsutdinova stej k tomu pśepšosyłej teke Anastasiju Kostiučenko-Kesslerowu a Měta Nowaka wót Serbskego instituta w měsće za fachowe pósuźowanje prezentacijow. Rainer Ptašk, złykomorojski Serb, jo teke pśibytny był. Studěrujuce su wjelgin kreatiwnje z tematiku wobchadali a baslili wšakorake interaktiwne kórtki, bildki, źěłowe łopjena, źe graśa a digitalne srědki. Głowne temy su byli serbske bajki, powěsćowe figury, wutoflowanja, ale teke jěza a nałogi. Su se procowali, serbsku rěc zapśěgnuś, na pśikład pśez o-zuki za nasłuchanje pśez QR-kody.