Z Pódstupima/Potsdam. Na swójom prědnem pósejźenju togo lěta jo se Rada za serbske nastupnosći 27. januara z wjele temami zaběrała, mjazy drugim jo dnjowny pórěd wopśimjeł temy kaž Bramborski rěcny pas, wótere rozpšawy, informacije wó digitalnem pakśe, monitoring Europskeje rady a financěrowańske dogrono Załožby za serbski lud.

Pětr Brězan, pśedsedaŕ towaristwa Serbskego kulturnego turizma, jo pśibytnym staw projekta „Serbske impresije“ pśedstajił. Tematiska sćažka za kólasowarjow, kótaraž pśiwobrośijo se serbskej kulturje a rěcy, trjeba spěchowanje we wusokosći wokoło 500.000 euro. Koncept stoj, ale dla financěrowanja jo Pětr Brězan pšosył Serbsku radu wó pódpěru. Cil jo krajny priorizěrowanje financěrowanja dojśpiś, kenž by pónižyło swójski późěl za wokrejs Górne Błota-Łužyca w Bramborskej a wokrejs Budyšyn w Sakskej, kótarejž stej pśewzełej głowne nosaŕstwo togo projekta a cotej se procowaś wó spěchowańske srědki z gjarnca za strukturnu změnu krajowu Sakska a Bramborska. Serbska rada co se za to zasajźiś.